सुधीर जाधव
तालुका प्रतिनिधी, सातारा.
सातारा : येथे जिल्हा रुग्णालयात नव्याने होत असलेल्या कॅथलॅबसाठी आवश्यक असणारी उव्दाहक यंत्रणा, विद्युत पुरवठा या कामासाठी राज्याचे सार्वजनिक बांधकाम मंत्री श्रीमंत छ. शिवेंद्रसिंहराजे भोसले यांच्या प्रयत्नातून 71 लाख 58 हजार 535 रुपये निधीला मंजुरी मिळाले आहे. यामुळे सुसज्ज कॉथलॅब लवकरच सुरू होऊन साताऱ्यातच रुग्णांवर मोफत शस्त्रक्रिया होणार आहे. ना. शिवेंद्रसिंहराजे हृदय रुग्णांसाठी आरोग्यदूत ठरले असून रुग्णांसह नातेवाईकांना दिलासा मिळणार आहे. सार्वजनिक बांधकाम मंत्री शिवेंद्रसिंहराजे भोसले यांच्या प्रयत्नातून सातारा जिल्हा रुग्णालय येथे हृदय रुग्णांसाठी असणारे कॅथलॅब सुविधा मंजूर झाली होती. जिल्हा रुग्णालय येथे कॅथलॅब स्थापन करणे करिता बांधकाम सुरू असून, याचा वेळोवेळी आढावा ना. शिवेंद्रसिंहराजे भोसले यांच्याकडून सातत्याने घेतला जात आहे. या कॅथलॅब निर्मितीमुळे सातारा जिल्ह्यातील गरीब व गरजू हृदय रुग्णांना मोफत व दर्जेदार उपचार मिळण्याची सुविधा उपलब्ध होणार असल्यामुळे त्यांच्या नातेवाईकांना मोठा दिलासा मिळणार आहे. त्यामुळे हृदय रुग्णांना उपचाराकरिता पुणे,मुंबई अथवा अन्य ठिकाणी जावे लागणार नाही. सुसज्ज कॅथलॅबमध्ये हृदय रुग्णांकरिता बाह्य रुग्णसेवा तसेच ईसीजी, टु-डी इको व हृदय रुग्णांकरिता आवश्यक असणाऱ्या सर्व चाचण्या तसेच अँजिओग्राफी, अँजिओप्लास्टी व बायपास सर्जरी आधी सुविधा मोफत उपलब्ध होणार आहेत. तसेच हृदय रुग्णांकरिता आवश्यक असणारे अत्याधुनिक सोयी सुविधांनी युक्त असे दहा बेडचा अतिदक्षता विभाग ही लवकरच सुरू करण्यात येणार आहे. दिवसेंदिवस बदलती जीवनशैली चुकीची आहार पद्धती व्यायामाचा अभाव यामुळे सर्व वयोगटांमध्ये हृदयाशी संबंधित अनेक आजार बळवत आहेत. याकरित योग्य उपचारासाठी मोठ्या प्रमाणावरती खर्च तसेच वेळ वाया जात होता. जिल्ह्यात आता आधुनिक सोयी सुविधा उपलब्ध झाल्यामुळे सातारा जिल्हा वाशियांना मोठा दिलासा मिळणार आहे. या महत्वकांक्षी प्रकल्पामुळे जिल्ह्यातील आरोग्य सुविधांना नवा आयाम मिळेल व गोरगरीब गरजू रुग्णांना दिलासा मिळेल असा विश्वास मंत्री शिवेंद्रसिंहराजे भोसले यांनी व्यक्त केला आहे. कॅथलॅबसाठी आवश्यक असणारे उद्धहक यंत्रणा विद्युत पुरवठा या कामासाठी भरीव निधी उपलब्ध करून दिल्याबद्दल सर्व स्तरातील नागरिकांकडून याबाबत समाधान व्यक्त केले जात आहे.
